منتديات المرقاب الأدبية

منتديات المرقاب الأدبية (http://www.montada.mergaab.com/index.php)
-   ..: مرقاب الرّكن الهادئ :.. (http://www.montada.mergaab.com/forumdisplay.php?f=112)
-   -   ( مقتطفاتي ) (http://www.montada.mergaab.com/showthread.php?t=37872)

شاعرة نجد 03-03-2010 01:27 PM

يابوي لو مرّن جديدات الأيام=ماعاش من يسلى بدونك وينساك
عقب الدلال أصبحت من عدّ الايتام=ياكثر دمع العين من عقب فرقاك
حول الثمان اشهور وأنا والاحلام=أقابلك فيها واقبّل محياك
أحلام تنعش خاطري كل ماانام=وان قمت! ما ألقااا غير حزنك وذكراك
:(

شاعرة نجد 03-03-2010 01:33 PM

نويت أقطع الأرسال,وابعد عن الأرسال=ولكن غلب حلمي,على ثورة أعصابي
حليمه وأحب الصبر,لودمع عيني سال=وأحب التأني,لو تعجّل بـي اركابـي
نهيت القوافي لاتمادَى ف..الاسترسال=عساها تطاوعني ولاتكشف احجابـي

شاعرة نجد 05-03-2010 12:14 PM

للورد في نفسي مكانه وتعبير=تعبير يدهشني من الروح للروح
تنثار له كل الاحاسيس وتغير=لاقام من حس الهواء عطره يْفوح
وأخاف لاهبّت عليه المعاصير=يفقد شذاه ويذبل الورد ويروح

شاعرة نجد 06-03-2010 09:03 PM

عسى خير ياحلم(ن) حلمته وطار النوم=وأنا نوم عيني لاتكـدّر علـى الريحـه
سعيده ومبسوطه ولكن قبـل كـم يـوم=حصل مااتحلّم به ولـو تـم توضيحـه
عجزت أفهم الموضوع لو قلت له مفهوم=عساي أدرسه وافهم سرايـر مفاتيحـه

شاعرة نجد 08-03-2010 01:29 PM

خذني على القارب ولاتسبق الموج=لاصار هادىء,رووعة الجو تغريك
خذني على قارب من الود مسروج=وأنا بغنـّي من قصيدي واسلّيك
خذ قاف(ن)أحلى من سواليف واهروج=واحلى من السكر,عن الزاد يغنيك
خذ عذب شعري واسمع الصوت ممزوج=بنغمة غلا,من صادق الروح تدعيك
خذني وسافر بي عن ظْروفي العوج=بعثر هْموومي,وازرَع الورد واهديك

شاعرة نجد 09-03-2010 02:15 PM

لبى القصيد الجديـد اللـي يسلينـي=لاضاق صدري وجاني زاالت هْمومي
يسير حرفي على كيفـي يحاكينـي=واعطيه روحي ويااخذ زبدة عْلومـي
ويترجم أحداث نفسي ليـن يروينـي=عزف المشاعر عليها الحسّ مختومي

شاعرة نجد 11-03-2010 11:45 PM

ياليل طبع الوفاا لاتقطعه تكفى=لاجيت بَسْهر معك بالله سامرني
أفرح الى أقبل ظلامك والنهار أقفى=نسيمك العذب مدري كيف يسحرني
واسرار قلبي على شرواك ماتخفى=ياما شكيت الْك همي وانت خابرني
ياليل مااظن جرحٍ في الحشى يشفى=خل انتسلّى عسى ربي يصبرني

شاعرة نجد 13-03-2010 12:21 PM

ياسحابه لانويتي تمطرين أبغى هزيم رْعـودك=يصْحِي النايم عشان أصحى وأجي وقت الهطول
يستثير الخافق المكتوم في حضـرة وجـودك=ليت وقتك ياسحابه في سمـاا جـوي يطـول

شاعرة نجد 14-03-2010 12:54 PM

نامت عْيون الناس والعين عيّـت=حسبي على ذا العين مكثر سهرها
لا أقبل ظلام الليل هلّـت وحيّـت=واستبشرت به واستهلّت مطرهـا
على السكون وكل فرصه تهيّـت=تشكي المواجع قبل يظهر سفرها

شاعرة نجد 14-03-2010 11:35 PM

البوح لامن جا من الروح مسموح=حتى ولو يكشف خفايـا سـدودي
لاشك مالي بعض الاحيان مصلوح=واخاف لا اطلع عن مراسم حدودي
أجحد مناوي خاطري واتعب الروح=وابصم بْعشري مامن البوح زودي

شاعرة نجد 14-03-2010 11:49 PM

أنا اللي لابغيت أهجـر حروفـي=نسيـم الليـل حركهـا هبوبـه
تناغم حسّها في وسـط جوفـي=على الرنّه تسابق فـي عذوبـه
وأنا اللي هاضني شوف القنوفي=إلى مـن لاح بارقهـا اعجوبـه
أناظرهـا ولـو طـوّل وقوفـي=تلاعـج مـن شمالـه لاجنوبـه
وأنا اللي طبعها بالعهـد توفـي=وأخاف السيل واحْذر من جذوبه
وأنا اللي ضاعت بْحرفي وصوفي=يْعاندني عسـى ماهـي عقوبـه
وأنا اللي من هموم الوقت أسوفي=ولبّسنـي عنـا التفكيـر ثوبـه
وسرى حرفي على طق الدفوفـي=طرب..مدري هواجيسي سروبـه

شاعرة نجد 16-03-2010 12:19 AM

عيني على سطح القمـر والثريـا=مالي على سطح البسيطه ولاحلـم
يأخذني التفكيـر واصعـد كذيـا=مع الخيال أرووح مدري وش العلم

شاعرة نجد 16-03-2010 10:04 PM

رسمت صورَتك من نسج الخيال ومسحت=عيّت تشكّل لي الصوره على ما أبي
لا استرسل الفكر والتصوير زان وفرحت=شوّش علي الخيال وُضاع كل اتعبي
ياما تخيّلت للريشه وياما شرحت=وجهزت من روعة ألواني على مكتبي
لازان رسمي على اللوحه,وأنا مااسترحت=من كثر ماتاهت أفكاري غرق مركبي

شاعرة نجد 18-03-2010 10:46 PM

لاصار ليلي طويل ونور عيني بعيد=مشكاي لله,عليك الصبر ياعيني
أدخل على النت والا أكتب جديد القصيد=ما أظنـّها كلها عنـّه تسليني

شاعرة نجد 19-03-2010 01:45 AM

خيول القاف تستعرض على الميدان منهدّه=شعاها الشوق يستطرد لها والخافق يْنادي
يقول أرجوك ماحان السباق الريح مشتدّه=بلاش مْن التهورتفرح أعدائي وحسادي

شاعرة نجد 19-03-2010 10:47 PM

أناجي نسيم الليل واثره على فاله=يثير المشاعر بس مايلتفت فيهـا
برااده على ضو القمر يكفي إلْحاله=أسجل عليه امن القوافي واغنيها

شاعرة نجد 20-03-2010 12:32 AM

في خاطري ضيقه من العصر للحين=تكتم على أنفاسي,على الله فرجها
وذا الحين تالي الليل والناس ممسين=عيّت تْفارقني بْواسع فـْججها
باسبابها ليلي سرى خاطري شين=وباسبابها دمع النواظر زعجها

شاعرة نجد 20-03-2010 01:46 PM

لو أني أقدر واجبر العين بالنوم=نومتها بالذات لاضاق صدري
نوومه عميقه مايكفي بعض يوم=عسى يرووح الوقت من غير مدري

شاعرة نجد 21-03-2010 10:08 PM

ياطير وين..اترووح عطني دوره=بالله تكـرم.. واهدنـي جنحانـك
تعال شرّف..غرفتي الْمَستـوره=شف نافذتها..مْقابلـه بستانـك
وأنا باحلّـق فالفضا..مسـروره=وارووح لاوطانٍ مهيب أوطانـك
يامـا قعدّت..أطالعك..مقهوره=وانْتَهْ..تغنّي من جديد ألحانك

شاعرة نجد 23-03-2010 01:34 PM

ياجديد الشعر هات مْن النوادر=يستعيد القاف عذبه من جديده
يرتوي الضميان من وارد و صادر=يشرح الخاطر ليا استرسل بريده
يوم ناديت الحروف أصطف كادر=يعزف الفنان منها مايريده
يطرب المشتاق لاسمع البوادر=يدري أن القاف صاغه من يجيده

شاعرة نجد 23-03-2010 02:00 PM

وش عاد لو غنيت واسترسل القاف=لاضاق صدري مانفعني قصيدي
نسجت من روعة مكاتيبي لْحاف=يلمّـني واقراه من راحة ايدي
رفيق عمري عقبك الدار ينعاف=لاغبت لاتسأل علي وش جديدي

شاعرة نجد 26-03-2010 12:10 PM

ياليتني أدري عن الغيب ياليـت=وياليت ربي لاغلطـت ايغَفرلـي
يغفر ذْنوبـي لاكتبـت وتمنيـت=وبالغ لسانـي بالتمنـي وزلـي
وشكيت من فوح المشاعر وغنيت=من صادق أعماقي ومن كل كلـي
وقمت أتمنى واتمنى بكـم بيـت=وش في نهاية سكتي بيحصللي؟


جميع الأوقات بتوقيت GMT +3. الساعة الآن 06:50 AM.

Powered by vBulletin® Version 3.8.6
Copyright ©2000 - 2018, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية