منتديات المرقاب الأدبية

منتديات المرقاب الأدبية (http://www.montada.mergaab.com/index.php)
-   ..: مرقاب الرّكن الهادئ :.. (http://www.montada.mergaab.com/forumdisplay.php?f=112)
-   -   ( مقتطفاتي ) (http://www.montada.mergaab.com/showthread.php?t=37872)

شاعرة نجد 27-11-2010 10:03 PM

الهاجس اللي مع الليل وظلامه سرى=ليته لياعاد ليلي مايعوّد معه
وارتاح وانسى هموم القلب واللي جرى=ماهبّت الريح طار ومانبي نجمعه
وأن جاا خيالي على عزف الحروف وقرى=كافي يجاوب على حسي ولايسمعه
نبره تجي مع سكون الليل م/أحدٍ درى=تضيع مع سكّة التمويه والمعمعه

شاعرة نجد 28-11-2010 08:50 PM

كان الفكر يتعب القلب وشرايينه=لاوالله الا يخَـلْف الله شراييني

شاعرة نجد 28-11-2010 09:15 PM

حزيينه!! على شاطىء البحر مابغيت الناس=لأن البحر مووجـه يشابـه هوااجيسـي
خذااني خيالي فووق موجه على قرطـاس=فيا للخيـااال وقاربـي مـن قراطيـسـي

شاعرة نجد 29-11-2010 01:49 PM

قريت لي درّه..على الجرح جتني=من مبتداهـا العذب..لامنتهاهـا
جتني كذا صدفه..مهي قاصدتني=ونفسي لقت..ف/أبياتها ماكفاها
قريتها..مدري هي اللي قرتني!!=وحلّقت معها..في معالي سماهـا

شاعرة نجد 01-12-2010 01:23 PM

أنا وشعري كلنا من فداياك=آمر واعبّر ماتبي في قصيده
زرني,تصفح ركن شعري وحياك=تابع مكاتيبي وأنا المستفيده
لازرتني رش المطر زار وياك=والقاف غنـّى في حضورك جديده
رفيق عمري وش حياتي بلياك=ملكتني والمالك الامر بيده
شف كم على الصفحه زهى الحرف طرياك=شف كم ذكرتك في مواقف عديده
غنيت في طيبك وجملة مزاياك=وغنيت لك في كل لحظه سعيده
وغنيت لامن غبت واشتقت لقياك=والشوق قاتل والمسافه بعيده
وأن كان ضاعت في مكاتيبي أرياك؟=قللي وألوّن بالقلم ماتريده

شاعرة نجد 03-12-2010 04:45 PM

زرعت بيدي من جمال الطبيعه=بين المحاني ورد,والورد فاخر
يسقيه قلبي لين خضّر ربيعه=واقفت به الاذواق فوق البواخر

شاعرة نجد 03-12-2010 10:55 PM

ياا ظروفي لاتحيّرت أسعفيني=بس كافي ضغط دايم ياظروفي
ليه ضدي ليه وأنتي تعْرفيني=لاخذاني الشوق غنت له حْروفي
وان ضحكت شوي جورك مقتفيني=ليتني أحتال وتردك كْفوفي
سلفيني من عنادك سلفيني=واكسبي فيني مع الوقت امعَروفي

شاعرة نجد 04-12-2010 01:17 PM

وشلون أبعثر على مكتوبي أشواقي=وشلون أسجل مواويلي واغنيها
لاصار ماهوب من طبعي ولا أخلاقي=أشحن نواظر بعيد الدار وابكيها
حسبي على الشعر كانه يكشف أوراقي=يفتح صناديق قلبي مايغطيها

شاعرة نجد 05-12-2010 01:53 PM

نحتاج جرعة حنان
,,,,,,,,,,مهما يطول الزمان
حتى لو انا كبرنا
,,,,,,,,,,نحتاج جرعة حنان

ليت القدر لاخذاهم
,,,,,,,,,,يرجع علينا صداهم
ونشكي عليهم سهرنا
,,,,,,,,,والشوق شاهد عيان

ياشين طبع الليالي
,,,,,,,,,,مادام غالي وغالي
على صحيفة قدرنا
,,,,,,,,,,ماكان مكتوب كان

شاعرة نجد 06-12-2010 01:36 PM

سرحت مْن الصباح وراح فكري=تعلاّ بي على ذيك السحابه
أطالع ف الجبال وتهت وكري=أقارن بين بعده واقترابه
لذاك الفكر تقديري وشكري=طلع بي فوق عن جو الكآبه

شاعرة نجد 07-12-2010 01:27 PM

http://www.alkaabi.org/vb/uploaded/2080_1243201699.jpg


الله يجازي الحمامه سجعها أشقاني=خطرٍ على حسها يقضي على روحي
مْنوّل(ن)لاسمعته ثار وجداني=ولعبت معها طرب ماهاضت جْروحي
واليوم جدّد عليه سجعها أحزاني=لاحيتها من صميم القلب بالنوحي
بلاش أكمل وأثير شْجون حباني=حرفٍ كتبته وحرفٍ رااح ممسوحي

شاعرة نجد 08-12-2010 11:49 PM

بين شمس الحقيقه وبين ذاك الضباب=تاهت أقدام قصاص الاثر في ضحاه
ضاع والشمس حيه م/أهتدأ للصواب=يحْسب أنه دليل! وضايعٍ في عماه
كنّه الضامي اللي راح يطرد سراب=مالقى شربةٍ لاتَـعْب تقطع ضماه

شاعرة نجد 10-12-2010 09:17 PM

لابأس ياوهج المشاعر كتمتك=بالله وأن طال المدا سامحيني
لومي على نفسي ولايوم لمتك=وأنا سجنتك غصب لاتجرحيني
لاتحسبين المشكله مافهمتك=الا وربي فاهمه ريحيني!!
أرضي بمقسومي,وانا ماظلمتك=حكم القدر جاري ولو بعد حيني
يكفي عن التعبير والبوح صمتك=لا أشرح لك ظروفي ولاتشرحيني

شاعرة نجد 10-12-2010 11:28 PM

زارني في منامي,حلوها من زياره=ليتها بس طالت كان ماضاق صدري
ليت ليلي على طوله خذا من نهاره=وطال نومي ورااح الوقت من غير مدري
ياخساره صحيت وضاع حلمي,خساره=ليتني من منامي ماتوقـّظت بدري

شاعرة نجد 12-12-2010 08:21 PM

يابحر يمنعني عن الغوص خوفي=شديتني وأنا م أجيد السباحه
أخاف لاتفتر معاصم كْفوفي=وأغرق وأنا في غبّتك بالصراحه
خوفي تعاون واتّحد مع ظروفي=واجتاحني وأسدل عليّه وشاحه
أبحرت في موجك وضاعت وصوفي=شكّل زراقك وسط عيني مساحه
عطني الأمان وسوّ فيّ امعَروفي=لاتحسبنّي فيك عيّنت راحه

شاعرة نجد 14-12-2010 12:29 PM

طارت طيور الغلا وارسلت مرسولي=فيه أشكي الشوق مدري أشكي الضيقه
عارضتها والمراايا عاكسه زولي=وأخذت لي في سماا الاحلام تحليقه
وأرسلت معها قصيدٍ عذب من قولي=شرحت خافي ضميري في طواريقه
بكيت من غربتي وابكيت مَن حولي=غربة متاهه سفرها صار توهيقه
وأن كان وصلت على وصفي ومدلولي=لابد يرجع عذولي ناشفٍ ريقه!

شاعرة نجد 16-12-2010 12:39 AM

كفايه ياهمومي ودعيني=حراام أصبحت ماعندي مناعه
صبرت وحت جورك رمش عيني=تمكنتي وأنا سمعاً وطاعه
ياليتك لانخيتك تسمعيني=تغيبي عن سماي بظرف ساعه
رجيتك ودعيني,طاوعيني=كفى,مالي على الصبر أستطاعه
قضى صبري عسى ربي يعيني=مصير وصار لو مابه قناعه
حمامه لانويتي تسجعيني=خذيني لا اشرق الصبح بشعاعه
أمانه وارفقي لاتوجعيني=غموض المختنق فلّي شْراعه
على الجنحان لاطحت أرفعيني=أمانه واحفظي روحي وُداعه
ب أغامر ياحمامه شجعيني=ضجيج الناس يزعجني سماعه

شاعرة نجد 17-12-2010 05:45 PM

وااضح شعوري غير واللي حصل غير=ماهوب من كيفي ولكن ضروري
ضحيت بشْعوري ولا أريد تبرير=تلاطم الأمواج غرّق شْعوري
ماهمني وش صار والا وش يْصير=شوري على نفسي وأنا طعت شوري
عقبه على مأساة والا على خير=أنا معك وفّيت وأنهيت دوري

شاعرة نجد 18-12-2010 01:30 PM

ياشينها شيناه قتل الأحاسيس
ياصعبها ,ياكبرها من جريمه

شاعرة نجد 20-12-2010 01:30 PM

عوودي علي ياغيمة الأمس عودي=ياحلو ليلي والمطر منك ودان
أسقي عْرووقي,غرّقيني وُزودي=حتى ولو ليل الشتاء برد,يزدان

شاعرة نجد 24-12-2010 12:00 PM

ماودي أوُصف غلاتك,خاف أهبّل بك=وأروح بك فالخيال الخصب فووق النجوم
بصمتي!!تمكّن غلاي بْروحك وقلبك=وشلون لو حرفي المعسول شن الهجوم؟

شاعرة نجد 25-12-2010 12:04 AM

الصبر محمود والحاصل يكفـّيني=م أظن غير الصّبَر فإيدي ولاحاجه
مدري المقادير!والا المشكله فيني=عيّت تعدّل وأحايلها ومنعاجه
جفيت قلبي عشان الوقت جافيني=وانهكت روحي ونار الوجد وهاجه


جميع الأوقات بتوقيت GMT +3. الساعة الآن 06:35 AM.

Powered by vBulletin® Version 3.8.6
Copyright ©2000 - 2018, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية