منتديات المرقاب الأدبية

منتديات المرقاب الأدبية (http://www.montada.mergaab.com/index.php)
-   ..: مرقاب الرّكن الهادئ :.. (http://www.montada.mergaab.com/forumdisplay.php?f=112)
-   -   ( مقتطفاتي ) (http://www.montada.mergaab.com/showthread.php?t=37872)

شاعرة نجد 10-10-2008 12:25 PM

ليت العيون اللي تكسَّـر هدبهـا=ترتاح لامن دمعها هـلّ صافيـه
والنفس ليت الشعر يطفـي لهبهـا=وابدع جزيل القاف واسهر واغنيه
ومشاعري لامن تهيّـج شغبهـا=ليت القلم بعض المكاتيب يخفيـه

شاعرة نجد 11-10-2008 10:51 PM

يقول ءلي أكتبي فيني قصيـده=وابيها فـي مكاتيبـك فريـده
وقلت أبشر على عيني وراسي=أصوغ القاف واكتب لك جديده
حبيبي ونور عيني ونبض قلبي=ولاغيرك ورب البيـت أريـده
نقشت اسمك وعلّقته بْصدري=يريف القلب ويـذوّب جليـده

شاعرة نجد 16-10-2008 07:02 PM

الليل يسري والهواجيس تسـري=والصبح قرّب مادخل عيني النـوم
وحتيش لو يطلع علي صبح فجري=ماني على بعض الهواجيس مليوم
يااامَكْثر آآهاتي وياطول صبـري=وياقوووم ياكثر الهواجيس ياقـوم
لوأني أكتب بالبحر جـف حبـري=شعرٍ عليه اسمي موقّع ومختـوم
لاشك أخاف مْن المقابيـل وادري=ماقل دلّ وكايف الشعر محشـوم

شاعرة نجد 26-10-2008 03:38 PM

الناس مثل الطيور ومثل فطرتهـا=وكلٍ سعادة حياته لا لقـى طيـره
ناسٍ فطينه ولاتخطـي بنظرتهـا=وناسٍ توهّق..عَوَضْها يالله الخيره

شاعرة نجد 27-10-2008 07:30 PM

خير الهدايا..ابخاطري باقة الـورد=وعليه قطرااات النـدى مستميعـه
وعلى شذاه أسرد..خفى خافقي سرد=جووري ملوّن من جديـد الطبيعـه

شاعرة نجد 27-10-2008 07:33 PM

البـر يعجبنـي إلـى زاان جــوّهـ=والارض خضرا والسما كلّـه اخْيـال
وريح المطر توّه على الأرض تـوّه=هتااان..بادي يشرح الصـدر والبـال
وقام السّنافي فـالضحى وشبّ ضوّهـ=وغنّى عَلَي مْن أعذب الشعـر مـوّال

شاعرة نجد 27-10-2008 07:35 PM

جاني..أمر ياسعود حضـر التجـوّل=ياقوة الله ! حيل مافي يـدي حيـل
على القوافي الحصر كنّه..امصـوّل=صوله جديده..وُخوفتي يطفح الكيـل
ماعاد هو بالكيـف واللعـب الاوّل=والعلم واضـح والليالـي مقابيـل
يمكن يزين الحال..ويمكـن يطـوّل=والبرق في بشايره يسبـق السيـل
والصبر زين وبعض الاشْيا تهـوّل=وش حكمتك ياقاضي العدل ب/الميل؟

شاعرة نجد 27-10-2008 07:38 PM

يابْيات شعري لادعيت احتزمتـي=ونظَمت لي من ورد بستانك احزام
مْن الله خلقني مابعد قلت قمتـي=الاّ وْتسبقني علـى البـاب قـدام
صفي حْروفك واستعدي وْدمتـي=أبي النقط لُولُو والابيـات حكـام
قومي تهيّض خاطري لا عدمتـي=أبغى قصيده ما بعد جت بَلَحـلام
ساعه أحب أكتب قصيدي بصمتي=وساعه أبي فيها زغاريد وانغـام

شاعرة نجد 01-11-2008 09:50 PM

ماللسهر داعي ولامنْه مصلـوح=يازينها لاصرت بالحال راضـي
ياخافقي ريّح..ترى مَنْت مسموح=بشكيك لاعذّبتني عنـد قاضـي

شاعرة نجد 02-11-2008 09:42 PM

من ديرتي لاديرته ست ساعـات=والعين تسقي العين ماجف ماهـا
ومصيبتي..قالوا ترى أبوك موات=ومشيت أعد..انجومها في ضحاها
وجيته وهو ماعاد يدري بمن جات=جلطه..على خير الأطبـا شفاهـا

شاعرة نجد 08-11-2008 08:54 PM

سحابٍ علينا من صلاة العصـر ودان=على ديرتي سبحان منْشِيـه سبحانـه
رذاذ المطر ريحه كما المسك والريحان=على تربةٍ قد هي من الوقت عطشانه

شاعرة نجد 09-11-2008 09:51 PM

ليل الشتاء بالذااات غير الليالي=الله يامحـلاه يامَطْوَلْ..اللـيـل
يعطي خفوقي لاتهيّض مجالـي=أكتب,أغنّي,أسهره...أعْشقه حيل

شاعرة نجد 10-11-2008 11:00 PM

http://www.up07.com/up8/uploads/d332778092.jpg


إليكم من جواالي

صووره وجو ممتع يثير البوح..

أنا أشهد إن شوف المطر يطرب الروح=علـى أول الوسمـي جديـد بكـوره
السيـل والغـدران والبـارق يلـوح=يكفي عن التعليق شكـلا وصـورهـ

شاعرة نجد 16-11-2008 10:06 PM

شعوري كان تسأل فـي غيابـك=شعور الشوووق واللهفه شعوري
تَحَسْب القلـب دالـه مادرابـك=وربي في عشاي وفي فطـوري
إذا ما الشوق والهاجوس جابـك=أنا من بيت أبوي أجيـك ازوري

شاعرة نجد 22-11-2008 08:49 PM

أنا اللي كلما جاب الهوى صوت البحر والموج=يلوف القلب همّ اللي مريض ويصعب عْلاجه
يذكّرني البحر ويثير همي والظروف العـوج=وعذابي ياعذابي يوم بيتـي قابـل امواجـه

شاعرة نجد 28-11-2008 09:29 PM

أمانه مايذكّرك الشفـا..والا الهدا..والسيـل=علـي الله يشهـد كلمـا اجيهـا تذكّـرنـي
حبيبي دام تَدري عن..شعوري مرهفه..بالحيل=حراام..اتْمرّبي..ذيك الاماكن وأنـت خابرنـي

شاعرة نجد 13-12-2008 11:58 PM

ياهيه لاتزعـل تـرى ماتحمّـل=من خلقتي ما احب كسر الخواطر
يانور عيني لو جفى الوقت صمّل=الصبر زين وصادق الود ناطـر
والحيـل لله والكريـم يْتجـمّـل=وانا نبيهه وأنت ياهيـه شاطـر

شاعرة نجد 17-12-2008 11:10 AM

أنا اللي ودي أبعد عنك..يا هالنت بـس سْبـوع=واعَزْل الشعر عني..واخفي أقلامي مع أورااقـي
وارووح أسكن مكان..الاتصال بْساحته مقطـوع=واجرّب كيف عـاش البدو..واتبـع كـل برااقـي
يجوز يْطيب لي وقتي..واعيش هْناك دون..ارْجوع=ويجوز أرجع على الديره..إذا ماخاطـري رااقـي
مزااجي صار مثل الطقس..له في كل ساعه نوع=يلوفه هاجسٍ يحرق..عْرووق الخافق..احرااقـي

شاعرة نجد 20-12-2008 09:04 PM

قااالوا إن الطير مسكين..وابن آدم قوي=قلت لا في ذمتي !!! إن الانسااان الضعيف
يكفي إن الطير عايش..على مايهتوي=ماحسب هم المفارق..ولابعد الوليف
ويكفي إن الطير..يطوي مساافااته طوي=لابغى مشهاة نفسه..لجنحااانه رفيف
لاطراله حاجةٍ رااح..مادوّر خوي=ومايفكر بالمؤونه..ولاقرص الرغيف
مرّ يوصل للخضيرااا..ومراات ايهوي=قلبه امن الهم..ومْصاارع الدنيا نظيف
ليتني والطير يا ابومحمد..نستوي=ليتلي مثله جناحين..بالريش الرهيف
أدري ان بعض التمناي..يكويني كوي=وادري إن الوقت..في ساعتي هذي مخيف

شاعرة نجد 27-12-2008 12:32 PM

ألووم الجفن لامن قلّ نوومـه=وأعاتب خاااطري لامن تهيّض
لو أن الليل يعطيني عْلوومـه=عطيته من علوومي لين أفيّض
لاشك الليل مايشكي هْموومـه=وأنا طبعي عجل والليل ريّـض

شاعرة نجد 31-12-2008 10:57 PM

يالله ياللي قدرتك..فوووق وتْفوق=جهد العباد اللي ضعيـفٍ جَهَدْهـا
تشفي مريضٍ حالته..تسْهر الموق=فيه الخبيث..اللي بكبـده لَهَدْهـا
أبوي حاله..كدّر الصفو والـروق=ينـووم ليل..وعشْـرةٍ مارقدهـا
حاله برى..لاعـاد لـذّه ولاذوق=وبنته جداها دْموعها..وش ابيَدْها

شاعرة نجد 02-01-2009 11:41 PM

أنا كل ماجـازت لـي القافيـه غنيـت=قصيدٍ عن هْـروج المخاليـق مغنينـي
على صفحتي لامن تهيّض ضميري جيت=أبعثر على الكيبـورد شـيءٍ يسلينـي
لو أقرأ نهاري كايف الشعـر مامليـت=يداوي جْروحٍ في ضميـري ويشفينـي
وأخاف أتعلاّ فـوق واطيـح !!مادريـت=ونفسي على رووس العلالي تهقوينـي
أتابع جزيل القاف..وأشتـاق لاقريت=حروف القصيد العذب تروي شرايينـي


جميع الأوقات بتوقيت GMT +3. الساعة الآن 03:36 PM.

Powered by vBulletin® Version 3.8.6
Copyright ©2000 - 2018, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية